भैरहवा । रुपन्देही प्रहरीले कार्यालयमा घुस दिन आउने एकजना वृद्धलाई बुधवार दिउसो नियन्त्रणमा लिई अख्तियार दुरुपयोग अनुसन्धानको क्षेत्रीय कार्यालय बुटवलको जिम्मा लगाएको छ ।
प्रहरीले चेकिङको क्रममा जेठ ३१ गते रुपन्देहीको सिद्धार्थनगर नगरपालिका वडा नं. ६ गल्लामण्डीबाट तत्काल साथमा कागजात नभएका आरोपमा यूपी ५३ एच २५४५ र यूपी ५१ एच ४१६९ नम्वरको २ वटा भारतीय मोटरसाईकल नियन्त्रणमा लिएको थियो ।
उक्त गाडी छुटाउनका लागि बुधवार जिल्ला प्रहरी कार्यालयका प्रहरी निरीक्षक कक्षमा घुस रकम १० हजार दिन खोज्दा प्रहरीले मर्चवारी गा.पा.वडा नं १ निवासी ६३ वर्षीय रामराज यादवलाई नियन्त्रणमा लिएको हो ।
यादव मंगलवार पनि सवारी धनी तथा कागजात नलिई गाडी छुटाउन आएको र बुधवार पैसा लिएर आएकाले उनलाई नियन्त्रणमा लिई घुस र रिसवत सम्बन्धी कसुरमा आवश्यक कारवाहीको लागि अख्तियार अनुसन्धान आयोगको कार्यालय बुटवलमा पठाईएको प्रहरी नायव उपरीक्षक धर्मराज भण्डारीले जानकारीदिए ।