भैरहवा । प्रदेश क्रिकेट छनोट प्रतियोगिता अन्तर्गत मंगलवारको खेलमा रुपन्देही र बाँके जिल्ला विजयी भएका छन् ।
रुपन्देहीको भैरहवास्थित सिद्धार्थ रंगशालामा जारी प्रदेशस्तरी टी–२० क्रिकेट छनोट प्रतियोगितामा मंगलबार रुपन्देहीले रोल्पालाई १४३ रनको फराकिलो अन्तरले पराजित गर्यो ।
यस्तै, बाँकेले अर्घाखाँचीलाई ८२ रनले पराजित गरेको आयोजकले जनाएको छ ।
पहिलो खेलमा टस जितेर पहिला ब्याटिङ गरेको रुपन्देहीले निर्धारित खेलमा ५ विकेटको क्षतिमा १८६ रनको उच्च स्कोर बनायो ।
जसमा निश्चल चौधरीले नटआउट ४७, संदीप सुनारले ४४, मिर्नाल गुरुङले २६, कृष्ण कार्कीले नटआउट २१ रनको योगदान गरे ।
बलिङमा रोल्पाका सलिम सेनले ३, सुरज रोक्का र दीपक विष्टले १÷१ विकेट लिए ।
प्रतिउत्तरमा उच्च लक्ष्य पछ्याएको रोल्पाले ८ विकेटको क्षतिमा जम्मा ४३ रन मात्रै बनाउन सक्यो ।
जसमा सरोज बस्नेतले १२ र मनिष विष्टले नटआउट ११ रन बनाउन बाहेक अन्य कुनै ब्याट्सम्यानले दोहोरो रन जोड्न सकेनन् ।
बलिङमा रुपन्देहीका कृष्ण कार्की, संदीप सुनार र शौरभ खनालले २÷२ विकेट लिए ।
यस्तै, अजय लोनिया र विक्रम भुसालले १÷१ विकेट लिए ।
संदीप खेलमा म्यान अफ दी म्याच घोषित भए ।
दोस्रो खेलमा टस हारेर ब्याटिङ गरेको बाँकेले ५ विकेट क्षतिमा १४३ रन बनायो ।
उसका लागि अनुपम सिंहले ३०, सुनिल भण्डारीले २९ र सिद्धान्तराज शाहीले २२ रन बनाए ।
बलिङमा अर्घाखाँचीका देवराज खनाल र जगतबहादुर क्षेत्रीले २÷२ विकेट लिए ।
प्रतिउत्तरमा अर्घाखाँचीले १६.५ ओभरमा सबै विकेट गुमाएर ६२ रन मात्रै बनायो ।
उसका लागि अरविन सारुमगरले १९ र देवराज खनालले १४ रनबाहेक अरु ब्याट्सम्यानले दोहोरो अंक बटुल्न सकेनन् ।
उसलाई सस्तैमा समेट्न बलिङमा खेलका म्यान अफ दी म्याच समेत रहेका बाँकेका आकाश विष्टले ५ विकेट लिए ।
यस्तै, रोशनकुमार शाही, सिद्धान्तराज र दीपेन्द्र रावलले १÷१ विकेट लिए ।
बुधबार रुपन्देही र गुल्मी तथा कपिलवस्तु र दाङ जिल्लाबीच हुनेछ ।
राष्ट्रिय खेलकुद परिषद्को आयोजनामा पाँच नम्बर प्रदेशबाट आठौं राष्ट्रिय खेलकुदमा सहभागी हुने क्रिकेट खेलाडी छनोट गर्न अन्तरजिल्लाबीच खेल भइरहेको छ ।
यहाँबाट उत्कृष्ट १४ खेलाडी बनोट गरी प्रदेशको एउटा टिम बनाई चैतमा हुने आठौंमा सहभागी गराइनेछ ।